हरि लेलक सर्वश्व सब केर कौशिकीक जलधार

हरि लेलक सर्वश्व सब केर कौशिकीक जलधार

जतहि देखी ततहि लागल बालु केर अम्बार ।

दुखें कातर कानि रहलै जाहिठाँ सब लोक

सोचि ई जे कोना चलतै जीवनक व्यापार ।

उगि आयल कास संगहि यत्र तत्र पटेर

काल्हि तक छल जतय लागल फसलि केर अम्बार ।

बसल अछि जे लोक एखनहु कौसकीक कछेर

मात्र जननी जन्मभूमिक प्रेमवश लाचार ।

कोस भरि केर बाट लागय जेना जोजन दूर

होइछ रहि रहि पथिक के मन जतय भय संचार ।

अछि तरूण जहिठाँ कतेको समस्या केर जाल

कोना हँटतै अछि जखन आन्हर बहिर सरकार ।

31-10-1994 : बनैनियाँ

मिथिला लोक संवाद केँ प्रेषित/ संभवतः प्रकाशित

दोख अपन झाँपि करय अनका उघार लोक

दोख अपन झाँपि करय अनका उघार लोक

बूझि रहल अपना केँ सब सँ बुधियार लोक ।

विद्या विवेकक नहि सम्प्रति अछि मानि कोनो

मानि रहल धन केँ अपन जिनगीक आधार लोक ।

प्रेमक नहि दरस कतहु देखबा मे आबि रहल

लागल अछि करबा मे स्वार्थक व्यापार लोक ।

जानि नहि तरूण कतय दुनिया ई भागि रहल

तकनहु नहि भेटैत अछि जग मे उदार लोक ।

21-01-1995 / मलाढ़.

[परिवेश (मासिक) सिंदरी के प्रेषित / संभवतः प्रकाशित]

एक गोट क्षणिका

द्रोपदीक चीर जेना नेता केर भाषण

रोगी केर पथ्य जेना कोटा केर राशन।

खाली अछि अनके लेल आजुक अनुशासन

विवश आइ जनता आ मूक बनल शासन ।

08.09.1994 / मलाढ़ 

तीन गोट क्षणिका

1.

पलंग धेनय बेटा आ टहलुक अछि बाप

सासु बनलि बहिकिरनी पुतहुक प्रताप

सब केर सब चिन्ता मे अपनहि बेहाल

देखै छी जतहि, ततहि एतबहि अछि हाल ।

2.

सरकारी डाक्टर शिक्षक आ वकील

चुस्त निजी प्राइक्टिस मे बाँकी छथि ढील

व्यर्थ करब हिनका पर कनियो भरोस

लोभय जनु लागय हिनक लुप्त भेल होश ।

3.

भ्रष्ट बनल अफसर वा भ्रष्ट बनल क्लर्क

बहुते अछि कठिन करब हिनका मे फर्क

लटका केँ राखब नित ऑफिस केर काज

धर्म हिनक नीति हिनक हिलकै छन्हि राज ।

मलाढ़ : 14.10.1994 शुक्र, (विजया दशमी)

विद्यापति स्मृति गोष्ठी केर किछु फोटो

देसिल बयना, हैदराबाद द्वारा 02.12.2012 केँ विद्यापति स्मृति गोष्ठीक आयोजन कयल गेल छल । ई आयोजन प्रत्येक वर्ष कयल जाइत अछि । अहि आयोजनक किछु फोटो एतय प्रस्तुत अछि । देसिल बयना हैदराबादक किछु निष्ठावन प्रवासी लोकनिक सक्रिय सांस्कृतिक संगठन थिक ।

 दीप प्रज्ज्वलित करैत 

देसिल बयना पत्रिकाक लोकार्पन

 वक्तव्य दैत काल