आगि ओ मिझैत की

रेखांकन : कुमार सौरभ
_________________________

आगि ओ मिझैत की जे घर-घर मे धधकल अछि

बाँचत की जान ओ जे फँसरी पर लटकल अछि ।

अपनहि सँ कुड़हरि ल’ टांग अपन काटि रहल

ककरा बुझाओत के बुद्धि सबहक सटकल अछि ।

एकहु बताहक इलाज भेनय मोश्किल सन

की होयत दुनिया केर सब केर सब सनकल अछि ।

गौतम आ गाँधीक आदर्शक जाप करैत

छगुंता एहि देशहु मे हिंसेटा भरकल अछि ।

आयुध केर ढेर पर  दुनिया ई बमकि रहल

होइछ नित युद्ध लोक युद्धे मे परिकल अछि ।

[मलाढ़ : 26.07.1984 /  देसिल बयना, हैदराबाद द्वारा 10 मई 2015 केँ आयोजित ‘मिथिला विभूति पर्वक’अवसर पर बहरायल स्मारिका मे प्रकाशित ।]

चालि सतरंज केर आइ सत्ता चलल

रेखांकन : कुमार सौरभ
________________________

चालि सतरंज केर आइ सत्ता चलल

जे परस्पर रहय मित्र शत्रु बनल ।

पानि मे माछ केर थाह अछि नहि कतहु       

मुदा बखरा मे नौ-नौ कुटिया पड़ल ।

मूर्ख जन बुद्धि केर आइ ठेका लेने

मूर्ख सबके बनौने बढ़ल जा रहल ।

देश केर दुर्दशा पर नहि ककरो नजरि

हित कोना साधि ली ताहि मे सब बझल ।

अछि आबहु समय जागू चेतू तरुण

चीन्हि भगबू जे देशक अछि दुश्मन अड़ल ।

________________________________

_____________________________________

_______________________________

[मलाढ़ : 05.09.1990 / देसिल बयना, हैदराबाद द्वारा 10 मई 2015 केँ आयोजित ‘मिथिला विभूति पर्वक’ अवसर पर बहरायल स्मारिका मे प्रकाशित ।]