कर्म जे हो मुदा सब निपुण बात मे

कर्म जे हो मुदा सब निपुण बात मे

हाथ सुतरय अपन सब रहय घात मे ।

के सज्जन के दुर्जन ई जानब कठिन

अछि कौवे अधिक हँस केर पाँत मे ।

होइछ सगिरो पुछारी एखन फूसि केर

सत्य कानय कतहु ठाढ़ भ’ कात मे ।

वैह नेता सफल अछि एखन देश मे

हो कि अन्तर जकर मोन आ गात मे ।

बढ़ि रहल जग एखन चैलि सौ केर धेने

अछि फँसल देश एखनहु छह सात मे । 

बहि रहल अछि हवा आइ उनटे ‘तरूण’

हाथ कंगन ससरि ऐल अछि लात मे ।

14-07-1994 : मलाढ़.

कर्णामृत ( फरवरी-मार्च, 1997 ) 

मे प्रकाशित ।