__________________
पहिल नवांकक प्रकाशनमे अपेक्षासँ बहुत बेसी विलम्ब भेल मुदा ‘भारती मंडन’क लोकार्पणक संक्षिप्त रिपोर्ट अहाँ सबसँ सझिया करैत अत्यंत प्रसन्नताक अनुभव भ’ रहल अछि । हमरा लेल ई आत्मिक संतोषक विषय थिक जे ‘भारती मंडन’ आब पाठक लोकनिक हाथमे पहुँचि चुकल अछि । आशा अछि डाक आ अन्य माध्यमसँ ई जल्दिये अपन समस्त पाठक धरि पहुँचि सकत ।
प्रकाशनमे आर्थिक
रचनात्मक वा कोनो तरहें, जे कियो प्रत्यक्ष अप्रत्यक्ष सहयोग केलनि, हुनका सबहक
प्रति हम आभार व्यक्त करैत छी । ‘भारती मंडन’क प्रकाशन अहीं सबहक सहयोगसँ संभव
होइत रहल अछि । आग्रह जे अपन सहयोग एहिना बनेने राखी ।
- तारानन्द झा 'तरुण'
__________________
मैथिली पत्रिका ‘भारती मंडन’क पहिल नवांकक लोकार्पण सम्पन्न
प्रस्तुति : अखिल
आनंद
19.03.2017(रवि दिन)
मैथिलीक बहुआयामी लेखनक पत्रिका ‘भारती मंडन’क पहिल नवांकक लोकार्पण आइ पटनाक बिहार रिसर्च सोसाइटी सभागार मे मैथिलीक वरिष्ठ साहित्यकार पं. गोविन्द झाक हाथें सम्पन्न भेल । दूपहर दू बजेसँ शुरू भेल एहि समारोहक अध्यक्षता साहित्य अकादमी पुरस्कारसँ सम्मानित साहित्यकार मंत्रेश्वर झा केलनि ।
‘भारती मंडन’ पत्रिकाक प्रकाशन सुपौल जिलाक एकटा छोट गाम मलाढ़ सँ वर्ष 1995 मे शुरू भेल छल आ किछु अपरिहार्य कारणेँ 2006 मे बन्न भ’ गेल छल । केदार काननक संपादनमे एहि अवधिमे प्रकाशित भेल पत्रिकाक कुल बारहो अंकक मैथिली जगतमे खूब स्वागत भेल छल आ एकर मूल्यांकन महत्वक काजक रूपमे कएल जाइत रहल अछि । लगभग एक दशककक बाद एहि पत्रिकाकेँ फेरसँ प्रकाशित करबाक लेल गेल निर्णयक उपरांत एकर पहिल नवांकक लोकार्पण केँ मैथिली जगत लेल उत्साहक खबरि कहल जा सकैत अछि ।
एहि अवसर पर ‘मैथिली पत्रिका आ भारती मंडन’ विषय पर एक गोट परिचर्चाक आयोजन कएल गेल जाहिमे सुकान्त सोम, विकास कुमार झा, शरदिन्दु चौधरी, रमानंद झा रमण, कथाकार अशोक आ धीरेन्द्रमोहन झा अपन विचार व्यक्त केलनि ।
परिचर्चाक बाद एकटा कवि सम्मेलनक आयोजन सेहो कएल गेल जाहिमे तारानंद वियोगी, तारानंद झा ‘तरुण’, रघुनाथ मुखिया, कामिनी, धीरेन्द्र कुमार झा, जगदीशचन्द्र ठाकुर आ वैद्यनाथ मिश्र कविता पाठ केलनि ।
कार्यक्रमक आरंभ मे पत्रिकाक संस्थापक-सह-प्रबंधक तारानन्द झा ‘तरुण’ आगत विद्वत लोकनिक स्वागतक संगहि पत्रिकाक पुनर्प्रकाशनक निमित्त भावनात्मक वक्तव्य देलनि । एहि कार्यक्रमक संचालन युवा लेखक पत्रकार किशोर केशव केलनि । कार्यक्रमक समापन पत्रिकाक सहायक सम्पादक अखिल आनंदक धन्यवाद ज्ञापन सँ भेल । आइये एकटा कार्यक्रम मे ‘भारती मंडन’ कलकत्ताक मैथिल सभक बीच सेहो लोकार्पित भेल ।
___________
No comments:
Post a Comment